జగన్మోహనాకార చతురుఁడవు పురుషోత్తముఁడవు

జగన్మోహనాకార చతురుఁడవు పురుషోత్తముఁడవు
వెగటునాసోదంబు ఇది నీవెలితో నావెలితో IIపల్లవిII

యెన్ని మారులు సేవించినఁ గన్నులూ దనియవు
విన్న నీకథామృతమున వీనులుఁ దనియవు
సన్నిధిని మిమ్ము నుతియించి సరుస జిహ్వయుఁ దనియదు
విన్న కన్నది గాదు ఇది నావెలితో నీవెలితో IIజగII

కడఁగి నీప్రసాదమే కొని కాయమూఁ దనియదు
బడిఁ బ్రదక్షిణములుసేసి పాదములు నివిఁ దనియవు
నుడివి సాష్టాంగంబు చేసి నుదురునూఁ దనియదు
వెడఁగుఁదన మిది గలిగె నిది నావెలితో నీవెలితో IIజగII

చెలఁగి నిను నేఁ బూజించి చేతులూఁ దనియవు
చెలువు సింగారంబు దలఁచి చిత్తమూఁ దనియదు
అలరి శ్రీవేంకటగిరీశ్వర ఆత్మ నను మోహించఁజేసితి
వెలయ నిన్నియుఁ దేరె మును నీవెలితో నావెలితో IIజగII 



జగన్మోహనాకారుడైన శ్రీవేంకటేశ్వరుడా నీవు పురుషోత్తముడవు,బహు చతురుడవు కూడా.
ఆస్వాదనము వెగటు కలిగిస్తోంది.ఇది నీ వెలితో నా వెలితో తెలియకుండా ఉన్నది.
నిన్ను యెన్ని మారులు సేవించినా నా కన్నులకు తనివి తీరటం లేదయ్యా. నీ కథామృతాన్ని ఎంత విన్నా నా చెవులకి తృప్తి కలగటం లేదయ్యా.మీ సన్నిధిలో మిమ్మల్నెంత నుతించినా కూడా నా నాలుకకు తనివి తీరటం లేదే.విన్నదీ కాదు, కన్నదీ కాదు.ఇది నా వెలితో నీ వెలితో తెలియరావటం లేదు.
నీ ప్రసాదాన్ని పొంది కూడా నా శరీరం తృప్తి చెందటం లేదు.నీ చుట్టూ ప్రదక్షిణలు చేసి చేసి నా పాదాలూ తనియటం లేదే.నీకు సాష్టాంగ నమస్కారాలు చేసి చేసి కూడా నా నుదుటికి తనివి తీరటం లేదయ్యా.వెడగు తనమిది కలిగింది.ఇది నా వెలితో నీ వెలితో తెలియట్లేదే.
నిన్ను పూజ చేసి చేసిన నా యీ చేతులూ తనివినొందటం లేదే.నీ అందమైన సింగారాన్ని తలచుకొని కూడా నా చిత్తమూ తనివినొందటం లేదే.ఓ వేంకటేశ్వరా నా ఆత్మనూ నన్నూ మోహింపచేసితివి.మునుపే ఇవన్నియు తెలియవచ్చినవి.కారణం నీ వెలితో నా వెలితో తెలియరావటంలేదే.తెలియ జేయవయ్యా.