చిత్తజగురుఁడ నీకు శ్రీమంగళం నా

చిత్తజగురుఁడ నీకు శ్రీమంగళం నా
చిత్తములో హరి నీకు శ్రీమంగళం. IIపల్లవిII

బంగారుబొమ్మవంటి పణతి యురము మీద
సింగారించిన నీకు శ్రీమంగళం
రంగుమీఱఁ బీతాంబరము మొలఁ గట్టుకొని
చెంగలించే హరి నీకు శ్రీమంగళం. IIచిత్తజII

వింత నీలములవంటి వెలఁదిని నీపాదముల
చెంతఁ బుట్టించిన నీకు శ్రీమంగళం
కాంతుల కౌస్తుభమణిఁ గట్టుక భక్తులకెల్లఁ
చింతామణి వైన నీకు శ్రీమంగళం. IIచిత్తజII

అరిది పచ్చలవంటి అంగన శిరసు మీఁద
సిరుల దాల్చిన నీకు శ్రీమంగళం
గరిమ శ్రీవేంకటేశ ఘనసంపదతోడి
సిరివర నీకు నిదె శ్రీమంగళం. IIచిత్తజII