జయ జయ రామ సమర విజయ రామ

జయ జయ రామ సమర విజయ రామ
భయహర నిజ భక్త పారీణ రామా II పల్లవి II


జలధి బంధించిన సౌమిత్రి రామా
సెలవిల్లు విరచిన సీతారామా
అల సుగ్రీవు నేలిన అయోధ్య రామా
కలిగి యజ్ఞము కాచె కౌసల్య రామా II జయ II


అరి రావణాంతక ఆదిత్యకుల రామా
గురు మౌనులను గాచే కోదండ రామా 
ధర నహల్య పాలిటి దశరథ రామా
హరురాణి నుతుల లోకాభి రామా II జయ II


అతి ప్రతాపముల మాయామృగాంతక రామా
సుత కుశలవ ప్రియ సుగుణ రామా
వితత మహిమల శ్రీవేంకటాద్రి రామా
మతిలోన బాయని మనువంశ రామా II జయ II