శ్రావణబహుళాష్టమి జయంతి నేఁడు

శ్రావణబహుళాష్టమి జయంతి నేఁడు
సేవించరో నరులాల శ్రీకృష్ణుఁడితఁడు. IIపల్లవిII

భావింప వసుదేవునిపాలిటిభాగ్యదేవత
దేవకిగనినయట్టి దివ్యరత్నము
చేవమీర సురలరక్షించేకల్పతరువు
యీవేళ జన్మించినాఁడు యిదె కృష్ణుఁడు. IIశ్రావణII

హరవిరంచాదులకు నాదిమూలకారణము
పరమమునులతపఃఫలసారము
గరుడోరగేంద్రులకుఁ గలిగిన నిధానము
యిరవుగా నుదయించె నిదె కృష్ణుఁడు. IIశ్రావణII

బలు యోగీశ్వరుల బ్రహ్మానందము
చెలఁగుభాగవతులచింతామణి
అలమేల్మంగకుఁ బతి యట్టె శ్రీవేంకటాద్రి-
నిలపై జన్మించినాఁడు యిదె కృష్ణుఁడు. IIశ్రావణII