వెనకేదో ముందరేదో వెర్ఱి నేను

వెనకేదో ముందరేదో వెర్ఱి నేను, నా

మనసు మరులు దేర మందే దొకో II పల్లవి II

చేరి మీదటి జన్మము సిరులకు నోమేగాని

ఏ రూపై పుట్టుదునో ఎఱగ నేను

కోరి నిద్రించ పరచుకొన నుద్యోగింతు కాని

సారె లేతునో లేవనో జాడ తెలియ ( నేను ) II వెన II

తెల్లవారినపుడెల్లా తెలిసితి ననేకాని

కల్ల యోదొ నిజమేదో కాన నేను

వల్ల చూచి కామినుల వలపించే గాని

మొల్లమై నా మేను ముదిసిన దెఱగ II వెన II

పాపాలుచేసి మరచి బ్రదుకు చున్నాడగాని

వైపుగ చిత్రగుప్తుడు వ్రాయుటెఱగ

ఏపున శ్రీవేంకటేశు నెక్కడో వెదకేగాని

నాపాలి దైవమని నన్నుగాచు టెరగ II వెనII