వీధుల వీధుల విభుఁడేగీ నిదె

వీధుల వీధుల విభుఁడేగీ నిదె
మోదముతోడుత మొక్కరొ జనులు IIపల్లవిII

గరుడధ్వజ మదె కనకరథం బదె
అరదముపై హరి యలవాఁడె
యిరుదెసల నున్నారు యిందిరయు భువియు
పరఁగ బగ్గములు పట్టరో జనులు IIవీధులII

ఆడే రదివో యచ్చరలెల్లను
పాడేరు గంధర్వ పతులెల్లా
వేడుకతో వీడె విష్వక్సేనుఁడు
కూడి యిందరునుఁ జూడరో జనులు IIవీధులII

శ్రీవేంకటపతిశిఖరముచాయదె
భావింప బహువైభవము లవే
గోవిందనామపు ఘోషణ లిడుచును
దైవం బితఁడని తలచరో జనులు. IIవీధులII