చెప్పరాదీ యింతి సిరులు

ముఖారి

చెప్పరాదీ యింతి సిరులు - దీని
వొప్పులిన్నియుఁ జూడ వొరపులో కాని IIపల్లవిII

ముదిత జఘనము మీఁది మొలనూలిగంటలవి
కదలు రవ మెట్లుండెఁ గంటిరే చెలులు
మదనుఁడుండెడి హేమమందిరము దిరిగిరాఁ
గదిసి మ్రోసెడి పారిఘంటలో కాని IIచెప్పII

కొమ్మపయ్యెదలోని కుచమూలరుచి వెలికిఁ
జిమ్ముటది యెట్లుండెఁ జెప్పరే చెలులు
యిమ్మైన మరుధనములెల్ల రాసులు వోసి
కమ్ముకొని చెంగావి గప్పిరో కాని IIచెప్పII

నెలతకంఠమునందు నీలమణిహారములు
అలరు టెట్లుండు కొనియాడరే చెలులు
లలితాంగి ప్రాణవల్లభుఁడు వేంకటవిభుఁడు
నెలకొన్న కౌఁగిటనె నిలిచెనో కాని IIచెప్పII


మొలనూలి గంటల రవము అంటే చప్పుడు (శబ్దము)
మ్రోయుచున్న పారిఘంటలు (గుడి ప్రాకారపు గంటలు?) గాను,
కుచమూలరుచి(వక్షోజ సంపద యొక్క అందము?) రాసులుగా పోసిన మరుధనముల
మీద కప్పిన చెంగావి లాగానూ,మెడలోని నీలమణిహారములు వేంకటవిభుని
కౌగిట నిలచిన లలితాంగి లాగానూ ఈ యింతి సిరులు (అందాలు) చెప్పనవసరం
లేనంతగా ఆమె వొప్పు లిన్నీ వొరపులు(?) గా ప్రకాశిస్తున్నాయి.