నల్లనిమేని నగవు చూపులవాఁడు

నల్లనిమేని నగవు చూపులవాఁడు
తెల్లని కన్నుల దేవుఁడు. IIపల్లవిII

బిరుసైన దనుజుల పీచమణఁచినట్టి-
తిరుపుఁ గై దువతోడి దేవుఁడు
చరిఁబడ్డ జగమెల్లఁ జక్కఁ జాయకుఁ దెచ్చి
తెరువు చూపినట్టి దేవుఁడు IIనల్లనిII

నీటఁ గలసినట్టి నిండిన చదువులు
తేటపరచినట్టి దేవుఁడు
పాటి మాలినట్టి ప్రాణుల దురితపు-
తీఁట వాపినట్టి దేవుఁడు. IIనల్లనిII

గురుతు వెట్టఁగరాని గుణముల నెలకొన్న-
తిరువేంకటాద్రిపై దేవుఁడు
తిరముగ ధృవునికి దివ్యపదంబిచ్చి
తెరచి రాజన్నట్టి దేవుఁడు. IIనల్లనిII