వలచి వచ్చితి నేను వానికిఁ గాను

వలచి వచ్చితి నేను వానికిఁ గాను
నెలవై మీ గొల్ల వాడనే తానుండు న(ంటా)టా IIపల్లవిII

చెందమ్మికన్నులవాఁడు చేతిపిల్లఁ గోవివాఁడు
యిందు వచ్చెఁ గంటిరా యేమిరే యమ్మా
మందలపసువులవాఁడు మకరాంకములవాఁడు
యెందు నున్నాఁడు చెప్పరే యేల దాఁచేరమ్మా IIవలచిII

నెమలిపించెమువాఁడు నీలమేఘకాంతివాఁడు
రమణుఁ డాతఁడు, మొక్కే రమ్మనరమ్మా
జమళి చేతులవాఁడు సంకుఁజక్రములవాఁడు
అమర మీపాలఁ జిక్కునట చూపరమ్మా. IIవలచిII 

పచ్చఁబైడిదట్టివాఁడు పక్షివాహనపువాఁడు
యిచ్చినాఁడు నా కుంగర మిదివో యమ్మా
చెచ్చెరఁ గొనేటివాఁడు శ్రీ వేంకటేశ్వరుఁడు
వచ్చి నన్నుఁ గూడినాఁడు వాఁడువో యమ్మా. IIవలచిI